Onyń bas dırektory Olga Baharevanyń aıtýynsha qamqorshy uıymnyń negizgi maqsaty osy sanattaǵy adamdardy sporttyq is-sharalarǵa tarta otyryp belsendi aınalysýǵa, saýyqtyrýǵa, deni saý, kúsh-qýaty kemel turǵylystarynan kem sezinbeýge umtyldyrý, áleýmettik jáne rýhanı dem berý bolyp tabylady. Bıyl birlestiktiktiń qurylǵanyna shırek ǵasyr tolyp otyr. Osy ýaqyt bederinde kembaǵal jandar kóptegen iri baıraqty jarystarǵa qatysyp, 250 altyn, 147 kúmis, 150 qola medal jeńip alǵan. Dúnıejúzilik arnaıy Olımpıada oıyndarynda jetken jetistikter de az emes. О́kinishke qaraı Qazaqstanda oı-sanasy tejelip, túrli dertke shaldyqqan 150 myńǵa jýyq bala bolsa, 18 myńy ǵana sportpen júıeli túrde shuǵyldanatyn kórinedi.
Týrnırdiń ashylý saltanatynda sóılegen sózinde oblys ákiminiń orynbasary Madııar Qojahmet taǵdyrdyń aýyr taýqymetine moıynusynbaǵan, oǵan qarsy qaısarlyqpen kúrese bilgen jandardy jumysqa ornalastyrý, jeńildikti baǵdarlamalarǵa qatystyrý, taǵy basqa jaǵdaılar týdyrylǵanyn aıta kelip, olardyń eńbekpen qatar sport, óner salalarynda belsendi qımyl tanytyp júrgenderin atap kórsetti.
Soltústik Qazaqstan kásibı-pedagogıkalyq kolledjdiniń stýdentteri Dmıtrıı men Evgenıı Sabırhýzınder byltyr Avstrııada ótken shańǵy jarysynda qola medal ıelengen. AQSh-ta uıymdastyrylǵan dúnıejúzilik jazǵy «Speshıal Olımpıks» týrnırinde bes soltústikqazaqstandyq kúmis júldeger atanǵan.
Daýn naýqasymen aýyratyndar jáne psıhologııalyq aýytqýlary bar sportshylar eki topqa bólinip ári jas erekshelikterine qaraı qysqa qashyqtyqtarǵa júgirdi. Uzyndyqqa sekirip, dop laqtyrdy. Estafetalyq saıysty qyzdyrdy.
Jalpy komandalyq esepte Soltústik Qazaqstan oblysy jeńistiń eń bıik tuǵyryna kóterildi. Ekinshi, úshinshi oryndardy jambyldyqtar men pavlodarlyqtar enshiledi. Jeńimpazdar men júldegerler túrli marapattarǵa ıe boldy.
О́mir Esqalı,
«Egemen Qazaqstan».
Soltústik Qazaqstan oblysy
